ԱՎԱԳ ՈՒՐԲԱԹ - ՃՐԱԳԱԼՈՒՅՑ ԶԱՏԿԻ

          Այսօր Ավագ շաբաթվա վեցերորդ օրն է՝ Ավագ շաբաթը: Երեկոյան բոլոր եկեղեցիներում մատուցվում է ճրագալույցի պատարագ՝ ազդարարելով Քրիստոսի չարչարանքների ավարտը և Փրկչի հրաշափառ Հարությունը: Ժողովուրդն արարողությունից հետո վառվող մոմերը տուն է տանում:
          «Քրիստոս յարեաւ ի մեռելոց, օրհնեալ է յարութիւնն Քրիստոսի». այս ավետիսովավարտվում է Պահքը, և սկսվում Սբ. Զատիկը:
          Շաբաթ օրը հիշատակվում է արարչության յոթերորդ օրը, երբ Աստված ստեղծելով աշխարհը վեց օրում, հանգստացավ Իր բոլոր գործերից. «Աստված վեցերորդ օրն ավարտեց արարչագործությունը և Իր կատարած բոլոր գործերից հետո՝ յոթերորդ օրը, հանգստացավ: Աստված օրհնեց յոթերորդ օրը և սրբագործեց այն, որովհետև այդ օրն Աստված հանգստացավ Իր այն բոլոր գործերից, որ սկսել էր անել» (Ծննդ. 2:2,3):
          Այնուհետև Նա օրենք տվեց եբրայական տոհմին՝ վեց օր գործել իրենց մարմնական կարիքների համար և յոթերորդ օրը հանգստանալ. «Առաջին օրը թող սուրբ հռչակվի։ Ձեզ համար թող սուրբ լինի նաև նվիրական յոթերորդ օրը։ Այդ օրերին ոչ մի աշխատանք չկատարեք, այլ կատարեցեք միայն այն, ինչ կապված է յուրաքանչյուր մարդու անձնական կարիքների հետ» (Ելք 12:16)։ Պատվիրեց նաև քննել անցած վեց օրերում իրենց կատարած գործերը և գործած սխալները խոստովանելով ու ողորմություն տալով՝ քավություն գտնել:
          Ավագ Շաբաթ օրը ևս մեկ հնարավորություն է հետադարձ հայացք գցելու, վերլուծելու սեփական սխալները և ապաշխարելու: Այս օրը հանդարտության մեջ խորհելու և գիտակցելու հնարավորություն է, որ Աստված մեր փրկության համար մարդացավ, մահացավ և հարություն առավ: Այս օրը լավ առիթ է արժևորելու կյանքը և նորովի շարունակելու այն` հնարավորինս առանց մեղանչումների: